Fin da formación en Florencia

O venres puxo o broche final a unha semana intensa de aprendizaxe e convivencia nos cursos que estivemos a realizar.

No curso de necesidades educativas especiais, comezamos a xornada cunha actividade de motivación compartida con dous grupos doutros cursos, que nos axudou a espertar, activarnos e crear un ambiente distendido. A continuación, presentamos as actividades que deseñáramos o día anterior e realizamos unha posta en común na que analizamos fortalezas e aspectos de mellora. Un dos retos máis comentados foi como implicar ás familias e aumentar a súa cooperación como membros da comunidade educativa sen que iso supoña a súa presenza directa dentro da aula. Reflexionamos sobre as dificultades actuais derivadas do ritmo de vida e das obrigas laborais, que ás veces fan complexa esta colaboración, pero tamén sobre a importancia de seguir buscando vías de participación realistas e flexibles.

A sesión rematou cun momento moi especial: tomamos un café nunha biblioteca pública próxima á academia e realizamos un feedback a través das cartas Dixit. Cada persoa escolleu unha imaxe coa que se sentía identificada e explicou o motivo, xerando unha reflexión emocional e simbólica sobre a experiencia vivida. Todo isto acompañado polas vistas da Basílica de Santa María Novella, que crearon un ambiente único para pechar o curso.

No curso de intelixencia artificial, traballamos arredor de cuestións moi actuais como a prevención das copias en tarefas e exames e o debate sobre o uso da IA, que polo momento non se considera plaxio pero require un uso responsable e transparente. Tamén analizamos as consecuencias medioambientais derivadas do desenvolvemento destas tecnoloxías, especialmente o elevado consumo de auga asociado ao funcionamento dos centros de datos. Ademais, coñecemos a extensión de Google Brisk Teaching e elaboramos un mapa mental colaborativo co fin de sintetizar todo o aprendido ao longo do curso.

Para pechar a experiencia formativa, recibimos os diplomas e dedicamos a tarde a unha visita cultural a Siena. Aínda que Florencia leva gran parte do protagonismo, esta pequena cidade sorprende polo seu encanto, a súa historia e o seu ambiente, converténdose nun final perfecto para unha semana Erasmus inesquecible.

 

Día IV da formación en Florencia

A sesión de hoxe estivo centrada na reflexión, a análise de casos reais e a aplicación práctica dos contidos traballados ao longo do curso.

No curso de necesidades educativas especiais, comezamos cun diálogo compartido sobre as aprendizaxes adquiridas estes días, o que nos permitiu consolidar ideas e identificar aqueles aspectos máis transferibles á práctica docente. Posteriormente, introduciuse unha parte teórica sobre o TDAH e o TEA. No caso do TDAH, afondamos nas dificultades relacionadas coa atención sostida, a impulsividade e a autorregulación, así como na importancia de ofrecer estruturas claras, anticipación e tarefas graduadas. En relación co TEA, reflexionamos sobre as dificultades na comunicación social, a flexibilidade cognitiva e o procesamento sensorial, destacando a necesidade de contornas previsibles, apoios visuais e intervencións baseadas nos intereses do alumnado.

A partir desta base, expuxemos diferentes casos reais presentes nas nosas aulas, o que favoreceu un intercambio de estratexias e enfoques de intervención. Para rematar a sesión, traballamos por parellas no deseño de actividades orientadas a dar resposta a estas necesidades, integrando principios de accesibilidade, participación e personalización da aprendizaxe. Estas propostas serán presentadas na próxima sesión, fomentando así a reflexión e a mellora compartida.

No curso de intelixencia artificial, a xornada comezou cun debate sobre a seguridade e o control no uso da IA, abordando cuestións como a privacidade dos datos, a fiabilidade da información e a responsabilidade no seu uso educativo. Tamén reflexionamos sobre a posible perda de coñecemento humano cando determinados procesos se automatizan, incidindo na necesidade de empregar estas ferramentas como apoio e non como substitución do pensamento crítico.

Ademais, exploramos novas ferramentas como Perplexity AI, centrada na busca de información con referencias; NotebookLM, que permite organizar e analizar documentos para xerar sínteses e conexións; e Curipod, unha plataforma para crear experiencias interactivas. Nesta última, realizamos diversas actividades poñéndonos no rol do alumnado, o que nos permitiu experimentar en primeira persoa a metodoloxía proposta e reflexionar sobre o seu potencial para fomentar a participación, a motivación e a avaliación formativa.

Día III da formación en Florencia

Aprender, experimentar e reflexionar foron os tres eixos principais da xornada de hoxe nos cursos que estamos a realizar en Florencia.

No curso de educación especial, comezamos cunha dinámica compartida con outro grupo doutro curso, o que nos permitiu intercambiar impresións e coñecer novas perspectivas. A continuación, realizamos unha actividade práctica moi interesante: debuxamos a distribución do alumnado nunha das nosas aulas e analizamos como a organización do espazo inflúe na aprendizaxe e no benestar, especialmente no caso do alumnado con necesidades educativas especiais. Posteriormente, expuxemos as nosas reflexións ao grupo.

Tamén tivemos unha parte teórica na que afondamos en dificultades específicas como a dislexia, a dispraxia, a dispraxia verbal e a discalculia. A partir desta base, puxemos en común diferentes estratexias que empregamos nos nosos centros para dar resposta a estas necesidades. A sesión rematou con dinámicas de empatía moi significativas: intentar copiar a sinatura doutra persoa coa man dominante e coa non dominante, ou escribir unha frase coa man que non utilizamos habitualmente para que outra persoa a lese. Estas actividades axudáronnos a comprender mellor as dificultades que pode experimentar o alumnado. Ademais, coñecemos o método ALC utilizado en Italia. Foi unha experiencia formativa moi enriquecedora e tamén divertida.

No curso de intelixencia artificial, iniciamos a sesión cun debate sobre a posible perda de habilidades e a dependencia que pode xerar o uso continuado da IA. Posteriormente, participamos nun obradoiro de escritura de prompts, empregando ChatGPT como titor para guiar novas aprendizaxes ou revisar contidos xa traballados. Tamén elaboramos un metaprompt propio para poder reutilizalo en diferentes contextos educativos. Ademais, exploramos ferramentas como MagicSchool AI, Canva e SimpleShow, analizando as súas posibilidades didácticas.

Fóra das sesións formativas, continuamos aproveitando a riqueza cultural da cidade, visitando a Galleria degli Uffizi e desfrutando do ambiente dunha das bibliotecas máis fermosas de Florencia, onde incluso é posible asistir a proxeccións de cine nun espazo único.

Día II da formación en Florencia

A xornada de hoxe en Florencia volveu combinar aprendizaxe, reflexión e intercambio de experiencias nos dous cursos que estamos a realizar.

No curso de inclusión en necesidades educativas especiais, comezamos con dinámicas para coñecernos mellor e presentar os nosos centros, explicando por que sería interesante visitalos. Foi un momento moi enriquecedor para compartir realidades educativas diferentes e poñer en valor o traballo que realizamos en cada contexto.

Posteriormente, afondamos na nosa identidade a través da metáfora do iceberg: reflexionamos sobre o que os demais poden ver de nós e aquilo que permanece oculto. A continuación, trasladamos esta idea á realidade do alumnado, pensando nun dos nosos estudantes e analizando que é o que se ve del, que perciben os seus compañeiros e que aspectos non son visibles a primeira vista. A partir desta análise, puxemos en común posibles estratexias e solucións para favorecer unha resposta máis inclusiva. A sesión rematou cun debate arredor dos conceptos de exclusión, segregación e inclusión, clarificando diferenzas e reforzando a importancia de avanzar cara a modelos educativos máis equitativos.

No curso sobre intelixencia artificial, a xornada centrouse nun debate sobre que é realmente a IA, empregando diferentes ferramentas para contrastar definicións e enfoques. Traballamos tamén cos estereotipos e prexuízos que poden aparecer na información xerada pola intelixencia artificial, reflexionando sobre como inflúen na educación e na sociedade. Entre as ferramentas coñecidas, exploramos Mizou, unha aplicación que funciona como un chat estruturado que permite ao alumnado interactuar e dialogar entre si a través de simulacións guiadas, favorecendo a participación, o pensamento crítico e a práctica comunicativa nun entorno seguro.

A través de dinámicas de posta en común, tanto en pequeno como en gran grupo, compartimos exemplos que evidencian esta realidade e debatemos sobre a necesidade dun uso crítico e responsable destas ferramentas no ámbito educativo.

No tempo libre, ambas profesoras aproveitaron o día soleado e festivo para continuar descubrindo a cidade, visitando lugares emblemáticos como o Ponte Vecchio, a Piazzale Michelangelo ou o Mercato San Lorenzo, gozando así da riqueza cultural e do ambiente único de Florencia.

Inicio da formación en Florencia

Durante a nosa mañá de hoxe, en Florencia, tivemos a oportunidade de participar en dous cursos que nos están a chegar novas perspectivas sobre educación e innovación.

O primeiro curso centrouse na atención á diversidade e a inclusión. Comezamos coas presentacións e diversas dinámicas para romper o xeo, que nos axudaron a coñecernos mellor e a crear un ambiente aberto e colaborativo. Entre risas e intercambio de ideas, realizamos choivas de ideas e compartimos experiencias dos nosos centros educativos sobre inclusión. Resultou moi enriquecedor poder aprender das prácticas doutros países, xa que o grupo estaba composto por participantes de Croacia, Irlanda e España, o que nos permitiu descubrir enfoques distintos e ferramentas que podemos aplicar no noso traballo diario.

O segundo curso centrouse no uso da intelixencia artificial na educación. Entre as actividades máis divertidas e creativas, cada un deseñou unha “habitación” mediante IA que representase a súa personalidade e intereses, unha forma innovadora de expresarnos e coñecer aos compañeiros. Tamén realizamos o ABC, unha dinámica en pequenos grupos que nos axudou a resumir e reflexionar sobre os contidos do curso. Ademais, puxemos a proba o noso radar para distinguir imaxes reais de imaxes xeradas con IA, unha experiencia sorprendente que nos fixo valorar o potencial destas ferramentas no ensino. Finalmente, debatemos sobre os diferentes usos da intelixencia artificial na educación, explorando como pode apoiar a personalización do aprendizaxe, fomentar a inclusión e enriquecer as metodoloxías pedagóxicas.

Ambos cursos foron unha experiencia inspiradora que combinou teoría, práctica e intercambio cultural, permitindo mellorar a nosa formación como docentes e abrir a nosa mirada a novas ideas e recursos educativos.